30/06/2011

Lapin aux prones et aux rojins

 

Ch'lapin aux prones et aux rojins

 

T'acates un biau lapin.

Ouais, jé l'sais bin, qu'cha coûte, mais t'in prinds quand même un gros, comme cha t'in minjras deux fos, aujourd'hui et pis cor ed'main, et pour au soir, t'aras qu'à minger du «rien»: du rien, comme al dijot matante Augusta, ch'est un briquet avec du fromache, qu'in trimpe dins du café ou bin du lait battu.

Pindant qu't'es chez ch'boucher, t'in profites pou li faire décoper cheul pôv biète. Au prix qui te l'vind, i peut bin faire cha pour ti.

 

L'vèl pour el lend'main, te mettras eune liv ed pruneaux et eune démi-liv ed rojins secs dins de l'iau pour qu'i gonfièlent.

 

Et pis te fras mariner tin lapin, mais atintion, pas dins l'iau, hein, m'loute. J'vas chi t'espliquer qu'mint i fot faire eune bonne marinate:

 

te mets dins tin saladier un lite ed'bière blonte, ordinaire cha ira, un nognon, eune branque ed thym, eune feule ed laurier, tros quate grains d'poife, eune paire d'écalettes, eune liche ed vinaigue, eune queuière d'huile, te toules, et, eune fos qu'tas mis tin lapin laddins, te laiches arposer tout l'nuite.

 

El lend'main, t'arsaques tin lapin et te l'réchues avec eune loque prope.

Te l'sales à t'mote et pis te fais arvénir ches morciaux d'lapin dins du bure.

Surtout il faut qu'cha cheusse bin rousti, te vas pas chi nous faire du rouf rouf, hein, biloute?

 

Après cha te réduis t'marinate, te sais l'faire, cha, au moins, hein? Nan? In vla cor eune! Attinds, ch'tespliques! Ej m'in doutos! Queule brêle, ti, alors! Man mère, misère ed malheur, in peut dire que j'd'ai eune bonne avec ti, fieu!

 

Te fais tout simpmint boulir cha dins ch'castrole, sans l'couverque, jusqu'à tant qui resse pu fonques el mitan! Ch'est pourtant po la mer à boire!

 

T'arwètes si ch'est à tin goût, te passes tout dins ch'passe-vite, te l'mets dins t'cocotte avec tin lapin, et te rajoutes ches prones et ches rojins qu't'as fait égoutter comme i faut.

 

Te laiches tout cha cuire tout duchmint eune tiote heure, et al dernière minute t'épaissis t'sauce avec eune queuière ed farine. Incor un tiot bouillon, et, hop, edsus l'tab et ch'est fin prête!

 

Avec cha, te sers eune peuntière à l'plure eq't'écrases dins l'sauce.

 

Man mère, mais qu'ch'est bon!

 

Edmain, te fras récauffer l'ress ed lapin et te l'minjras avec eune masse ed frites, ch'te dis qu'cha!

Merci, Micheline!

17:21 Écrit par Patryck Froissart dans Cuisine | Lien permanent | Commentaires (0) | Tags : chti, prones, rojins | |  del.icio.us | | Digg! Digg |  Facebook | | | |  Imprimer | Pin it! |

Écrire un commentaire